Jardinos fioridos de lizos biancos

Sa luna bìaitta in chelu est’accherada

Pedes isculzos sinnant su caminu

Infusta de lentore sa campagna fozida

Sa Jana de s’amore inie est naschida

Sonnìende unu mundu de paghe….

So sa Jana de s’allegria

So s’ispera chi no morit

In su sinu meu fiorit

S’innozzente fantasia

So sa Jana de s’allegria

Sette perfidos ladrones

Furadu m’an su tesoro

E pro custu sas pessones

Morte e gherra an in coro

So sa Jana de s’allegria

Falan dae s’aera chi paren lampizzadas

Isvanessit s’ispera de paghe indeorada

Un istriore si tremet in coro

A custa oghe de milli lamentos

Oh Jana de sa paghe, de amore innozzente

Naram’itte si faghet pro cumprender’ sa zente

Ue est su sole chi sinnat sas dies

S’andanta de s’omine e de sas istajones

So sa Jana de s’allegria….

A chircare in monte tundu

Sa Jana de s’amistade

Pro chi torret s’onestade

In sas baddes de su mundu

So sa Jana de s’allegria