DIGHIRIDERA (MLC )

Dinghi       dighiridindi dighiridera…

Privendemi de una costa mia

T’at generadu Deu Soveranu

E benis a innoghe a mi ponner’ marranu

Sa oghe mia est’oghe de anghelu

S’abbivvant sas istellas in su chelu

A custu sonu de amore e paghe

Frimma e forte che unu nuraghe

Armonica, intonada e fiera

Sò deo sa femina chi cantende

Allegrat finas a su rusignolu

Sa oghe durche de su pippìolu

M’at dadu sa natura generosa

Cando cant’eo fiorit sa rosa

M’accumpagnat su riu canta canta

Mi sorriet sa zente totta canta

Mustrendemi un’istima sinzera

Sa oghe mia est sa pius potente

Chi mancu tue nd’as un’idea

Bella che su sole in oriente

Cando saludat sa terra intrea

Dachi b’at gara su premiu leat

Ca m’iscultat sa zente riverente

Uriosa che bentos de traschìa

Ma connoschet finas sa melodia

Finida s’istajone frittorosa

S’accherat su ‘eranu sorridente

Sa oghe mia no, no est potente

Ma ninnat e carignat ogni cosa

In sa die ‘e s’affidu est un’isposa

Bella, candida pura e lughente

A custu sonu si mudat sa terra

Irmentighende dogni cuntierra

Mamma Natura chi est gloriosa

De dogni cosa issa est reina

A nois duos at dadu un’istrina

Una potente una armoniosa

Che vena de abba bundanziosa

No finat mai custa serentina

Cantende umpare donamos recreu

Dae Chelu nos beneigat Deu

SONNIENDE (MLC )

In d’una nott’e luna so dormidu e in su sonnu bido a tie

Bella che un’istella luminosa dachi ses affacc’a mie

Inue ses naramilu!

Dachi su sole est’accheradu in chelu tue mi ses isparida

Si tremet custu coro a su pensamentu chi t’appo perdida

Ses bisione arcana in nottes galanas

Sas laras de cariasa sunt che braja in sa carena

E sas manos lenas lenas subra sas petorras mias

Peraulas sutta oghe a s’orija mi ses nende:

“pro sempes tua”

Duas carres una sola diventan cun s’amore

Faeddan sos istriores ca t’intendo solu mia

Peraulas sutta oghe a s’orija mi ses nende :

“amore faghemi solu tua, ancora”!

CHIMERAS (MLC)

Passione pro sa musica tenzo dae minore

Jog’ a jogu apo cominzadu a cantare

Est colada sa zente che-i sos rios

Amigos ch’an furadu sos sonnios mios

Amigos e collegas chi vendides ispantu

Cherrades una vida cun mulinos a bentu

Su cantu est che s’attonzu ’e sa rundine

Si che olat su cantante e resta s’omine

Pro unu punzu de ’inari o unu prattu de gloria

De bos vender s’amigu no tenides timoria

Mantenidebos sa fama sa gloria e

Si cherides dae crasa bos jamo “Vostè”

No nde cherzo de vana gloria no cherzo passare a s’istoria

Mi cuntenta solamente s’affettu sinzeru de paga zente…

No nde cherzo falsos risos indeorados paradisos

Faulas o falsa amistade ma sa santa veride

Ses pienu de amigos si vestis corona

Ma de tempus pro te s’istar male no nd’ana

Amigos pagos e bonos su dizu antigu

Narat chi agattas tesoro si agattas un amigu

Ammentade chi Giuda pro sos trinta dinares

No b’at pensadu meda a si ender su Segnore

A s’omine chi s’istima la rezit gai

In su tempus una paga no li mancat mai

No nde cherzo de vana gloria no cherzo passare a s’istoria

Passione pro sa musica mi faghet cantare

Meritu de sa zente si poto sighire

Zente ch’azzes dadu affettu a su coro meu

In bona sorte e fortuna bos lu torret Deu

BENI AJO’ GALANA (N.Loi)

Beni ajò galana cun megus a mi faghes cumpagnia

Una dilliriana ti la cherzo cantare in poesia

E che una campana deves intendes custa oghe mia

Su melodicu sonu t’at a tremer in coro che unu tronu

Sa oghe ‘e su ‘eranu che cantigu suave ‘e sos puzones

Unu tempus galanu t’at a battire sas bellas cantones

Si mi leas sa manu as a proare noas emoziones

Istuda su dolore sa oghe sanadora de s’amore

Ballos, cantos e sonos chi faghen parte de sa terra mia

Donan momentos bonos e ti che ogan tota s’angustia

Cun sos diversos tonos ti creschen in su coro s’allegria

E in d’unu mamentu su malumore imbolas a su ‘entu

Chin su cantare meu in totas sas piatas de Sardigna

Contra a su modu feu aboghinamus in manera digna

In oras de recreu bogamus che pandela bon’insigna

Cantamus pro sa paghe in cust’antiga terra ‘e su nuraghe

COMO CHI (MLC)

Como chi su sole indorat sa die

Como chi bi ses tue insoru a mie

Mi paret sa domo mia candida che su nie

Como chi torro a domo istraccu ma serenu

Intendo de sa bell’istajone s’alenu

Como chi! Como chi!

Como chi semus umpare manu in sa manu

Dogni di’e s’annu paret unu beranu

E biden sos ojos mios su currer de chentu rios

Falende dae sos montes

De fronte

Fiores coloridos

Sa presenzia tua su coro mi consola

M’intendo cun sa natura una cosa sola

Como chi! Como chi!

S’ANGHELU MEU (MLC)

Como una cantone ti cherzo cantare

Pro ch’in su sonnu ti pottat ninnare

Fizz’istimadu dachi ses arrivvidu

Pagas oras bonas o de gosu t’as bidu

Sa malasorte anima mia

Est dispensera solu de angustia

M’invoco a sa Madonna e a Deu

Sian amparu pro s’anghelu meu…

E che anghelu olende bae coro meu

Sighi su caminu chi t’at sinnadu Deu

Babbu e mamma ti sian costante recreu

In sas dies de anneu ca ses s’anghelu meu

Fizz’istimadu nessi un’ora ‘e fortuna

Pro t’ider joghende sena pena, manc’una

Cun sos amigos juvilende e currende

Dapoi a domo recuinde e contende

S’aia potidu seberare

Sa vida mia cun sa tua jambare

Molzende in su metessi mamentu

Chi t’ido sanu, serenu e cuntentu

E che anghelu olende bae coro meu

Sighi su caminu chi t’at sinnadu Deu

Babbu       e mamma ti sian costante recreu

In sas dies de anneu ca ses s’anghelu meu

ALLEGRIA ( Cirque Du Soleil-MLC)

Alegría, como la luz de la vida

Alegría, como un payaso que grita, Alegría

Del estupendo grito, de la tristeza loca

Serena, como la rabia de amar

Alegría, como un asalto de felicidad

Allegria, come un lampo di vita

Allegria, come un pazzo gridar, Allegria

Del delittuoso grido, bella ruggente pena, serena

Come la rabbia di amar, Allegria

Come un assalto di gioia

Beautiful roaring scream, of joy and sorrow, so extreme

There is a love in me raging, Allegria

A joyous, magical feeling

Allegria, dach‘istimas sa vida

Allegria, la ides in dogni cosa

Allegria, In s’abba ‘e su mare o un’accherada ‘e sole

Serena, che una carigna de mama

Allegria, si podes amare ancora…

Beautiful roaring scream, of joy and sorrow, so extreme

There is a love in me raging, Allegria

A joyous, magical feeling

Como la rabia de amar

Alegría, como un asalto de felicidad

SU BALLU NOU (MLC)

Unu passu a manca, un ater’a dresta

Duas bortas s’inchinu, cominza sa festa

Unidos umpare, tot’a manu tenta

Sa persone trista che torret cuntenta

Ajò a s’intundu, custu ballu sia(t)

In tottu su mundu sinnu de allegria

Sole e luna, chelu e terra, Mares e montes no gherrana,

Luna e sole, terra e chelu montes e mares no gherran abberu

Salude Maria ses mamma ‘e Deu

Dona s’allegria a su coro meu

Sinnat su caminu, a manera faghe

B’appat illuinu de terrena paghe

Sa musica, sos ballos, che pregadoria

Arriven a su Chelu a Deus e a Maria…

Est bella sa festa si b’at bonidade

E su ballu siat sinnu de amistade

Ajò a s’intundu, custu ballu sia(t),

In tottu su mundu sinnu de allegria

Sole e luna, chelu e terra, mares e montes no gherrana,

Sa musica, sos ballos, che pregadoria

CANTOS A TENORE (G.Piras e Tradizionale)

Accudide a su folklore, a faghes su ballu tundu

Ca est su       menzus de su mundu, cand’est cantad’a tenore

Tempiesas in curruttu frundidechelu s’isciallu

Faghidebos custu ballu, iscurtade custu muttu 

Tiscali antigu villaggiu in mesu de roccas calcares

Ponidebos in viaggiu andade a lu visitare

Gruttas e domos de janas chi meraviglian sa vista

Ammiran sos turistas chi andan a Oliana 

Milia vatu’ sa trota pro sa die ‘e s’isposonzu
Carculanne su bisonzu ca non b’ana cosa cotta
Su maritu ‘e Liotta su connatu ‘e Mugrone
De su cojuviu novu nd’est cuntentu Cadone 

Pizinnas bellas che nd’at in totue

Ma che Silanus narami inue

A bois naro bellos bajanos

Si nde cherides benide a Silanos 

Lizera, lizera ses, s’istella de melodia

Tue sola ses sa mia, atera no nd’adoro

Lizera, lizera ses, sa bella l’appo mirada

Dae pizinna minore andende a missa mazore 

Una traina rubia famosa est bennida a su monte seneghesu

Chirca pastura in su logu tesu ca s’annada est meda bisonzosa